NÅR MIN VÅR VAKNAR

 

Når min vår vaknar                                    

tilber han ljoset og vona.

Han gøymer seg i

dei drypande vassdropane

frå taket.

Han smeltar snøflekkane

som eingong fekk frosten inni seg.

 

Når min vår vaknar

målar han lysegrøne landskap

med livslyst.

Han openberrar seg gjennom

dansande vengeslag frå fivrelda

og lettføtte linerler

på leiting etter vårteikn.

 

Når min vår vaknar

lyttar bjørka med sine museøyro

og mauren byrjar våronna.

Hestehoven ser det som skjer

og smiler gule smil

midt i steinrøysa.

 

Når min vår vaknar

treng eg berre sjå framover -

nok til å fange augneblinka

frå ein ljosare morgondag.