NÅR MIN VÅR VAKNAR

 

Når min vår vaknar                                    

tilber han ljoset og vona.

Han gøymer seg i

dei drypande vassdropane

frå taket.

Han smeltar snøflekkane

som eingong fekk frosten inni seg.

 

Når min vår vaknar

målar han lysegrøne landskap

med livslyst.

Han openberrar seg gjennom

dansande vengeslag frå fivrelda

og lettføtte linerler

på leiting etter vårteikn.

 

Når min vår vaknar

lyttar bjørka med sine museøyro

og mauren byrjar våronna.

Hestehoven ser det som skjer

og smiler gule smil

midt i steinrøysa.

 

Når min vår vaknar

treng eg berre sjå framover -

nok til å fange augneblinka

frå ein ljosare morgondag.

 

ENGLAR OG DRONAR

Då Jesusbarnet vart fødd,

song englane

om fred på jord.

I dag er det dronane

som skyggar for håpet

med sine dødsmesser.

Kven har ansvaret

for å lære desse skapningane

englesongen?

 

DEI VIKTIGE SAMTALENE

Det er ikkje alltid

dei viktigaste samtalene

vert haldne i kyrkja.

Nokre gonger oppstår det

heilage samtalerom

midt i supermarknaden…

 

NÅR BLOMANE TALAR

 

Ser ut av sjukehusvindauget.

I dag har kirsebærtreet sprotte.

Dei ljose blomane talar i slike stunder -

og eg svarar tilbake: Tusen takk!

 

NOKRE SETNINGAR

Nokre setningar gjev helsebot

når dei vert sagde.

Ei slik setning er:

Eg er så glad for at du er du.

 

VIKEPLIKT

Han tilhøyrer den kategorien menneske

som nektar å vike for vikeplikta…

 

FARTSGRENSE

Eg sluttar aldri

å forundre meg

over enkelte medtrafikantar

som tutar, viser fingeren og ropar bannord

når eg fylgjer den lovlege fartsgrensa.